அசாம் மாநிலத்தில் ஏற்பட்ட வெள்ளத்தில் சிக்கி உயிரிழந்தோர் எண்ணிக்கை 100 ஆக உயர்வு!

திஸ்பூர்: அசாம் மாநிலத்தில் வெள்ள நிலைமை தொடர் தீவிரத்தன்மையுடன் நீடித்து வருவதால், மாநிலத்தில் இந்த ஆண்டு வெள்ளத்தால் உயிரிழந்தவர்களின் மொத்த எண்ணிக்கை 100 ஆக உயர்ந்துள்ளது.

அசாம் மாநிலம் முழுவதும் 1.47 லட்சத்திற்கும் அதிகமான மக்கள் வெள்ளத்தால் பாதிக்கப்பட்டுள்ளனர். சோனித்பூர், நாகான், கோலாகாட், சிவசாகர், ஹோஜாய், டர்ராங், ஜோர்ஹாட், தேமாஜி, சாரைடியோ, கார்பி ஆங்லாங், லக்கிம்பூர் மற்றும் பிஸ்வநாத் உள்ளிட்ட 12 மாவட்டங்கள் தொடர்ந்து வெள்ளத்தால் பாதிக்கப்பட்டுள்ளன.

இதில் கோலாகாட் மாவட்டத்தில் அதிகபட்சமாக 61,735 பேரும், சிவசாகரில் 43,492 பேரும், ஜோர்ஹாட்டில் 24,283 பேரும் பாதிக்கப்பட்டுள்ளனர். பாதிக்கப்பட்ட மாவட்டங்களின் எண்ணிக்கை படிப்படியாகக் குறைந்து வந்தாலும், வீடுகள் மற்றும் சாலைகளை வெள்ளநீர் சூழ்ந்துள்ளதால் ஆயிரக்கணக்கான மக்கள் நிவாரண முகாம்களில் தங்க வைக்கப்பட்டுள்ளனர்.

விவசாய நிலங்களில் வெள்ளம் புகுந்ததால் பயிர்கள் நாசமடைந்துள்ளன. தேங்கியுள்ள  தண்ணீரை வெளியேற்றுவதும், சேதமடைந்த உள்கட்டமைப்பு வசதிகளைச் சீரமைத்து மக்களின் வாழ்க்கையை மீண்டும் இயல்பு நிலைக்குக் கொண்டுவருவதும் தற்போது மிகப்பெரிய சவாலாக உருவெடுத்துள்ளது.