திமுக கூட்டணிக்குப் பிறகு பிரேமலதா அதிரடி… தேர்தல் பணியை முடுக்கிவிட்ட தேமுதிக

திமுக கூட்டணியில் இணைந்த பிறகு தேமுதிக பொதுச்செயலாளர் பிரேமலதா விஜய்காந்த் அடுத்தகட்ட நடவடிக்கைகளில் ஈடுபட்டுள்ளார்

தேசிய முற்போக்கு திராவிட கழகம் (தேமுதிக) சார்பில் வரவிருக்கும் சட்டப்பேரவைத் தேர்தலை முன்னிட்டு, போட்டியிட விருப்பமனு அளித்தவர்களுடன் கட்சியின் பொதுச்செயலாளர் பிரேமலதா விஜயகாந்த் நேர்காணல் நடத்தினார்.

களத்தில் குதித்த பிரேமலதா

சென்னையில் நடைபெற்ற இந்த ஆலோசனை மற்றும் நேர்காணல் நிகழ்வில், சென்னை, ராணிப்பேட்டை, வேலூர், திருப்பத்தூர், திருவள்ளூர் உள்ளிட்ட தொகுதிகளில் இருந்து விருப்பமனு பெற்றவர்களிடம் தனிப்பட்ட முறையில் கேள்விகள் எழுப்பப்பட்டதாகத் தெரிவிக்கப்படுகிறது. அவர்களின் கட்சி பணி, மக்கள் தொடர்பு, தொகுதி நிலைமை, தேர்தல் தயாரிப்பு உள்ளிட்ட அம்சங்கள் குறித்து விரிவாக மதிப்பீடு செய்யப்பட்டதாக கட்சி வட்டாரங்கள் கூறுகின்றன.

தேமுதிக-திமுக கூட்டணி

குறிப்பாக, தேமுதிக சமீபத்தில் திராவிட முன்னேற்றக் கழகம் (திமுக) கூட்டணியில் இணைந்துள்ள சூழலில் இந்த நேர்காணல் முக்கியத்துவம் பெறுகிறது. நேற்று திமுகவுடன் கூட்டணி உறுதி செய்யப்பட்டதைத் தொடர்ந்து, கூட்டணிக்கான தொகுதி பங்கீடு மற்றும் வேட்பாளர் தேர்வு பணிகள் தீவிரமாகும் நிலையில், இந்த ஆலோசனை நடைபெற்றதாகக் கூறப்படுகிறது.

கட்சியின் நிலைப்பாட்டை வலுப்படுத்தவும், கூட்டணிக்குள் தேமுதிகக்கு ஒதுக்கப்படும் தொகுதிகளில் வலுவான வேட்பாளர்களை நிறுத்தவும் இந்த முன் ஆய்வு நடவடிக்கை மேற்கொள்ளப்பட்டதாகத் தகவல்கள் தெரிவிக்கின்றன. மாவட்டச் செயலாளர்கள் மற்றும் மூத்த நிர்வாகிகளும் இந்த செயல்முறையில் பங்கேற்றதாக கூறப்படுகிறது.

திமுக கூட்டணியில் இணைந்த பிறகு தேமுதிக எடுத்த முதல் அமைப்புசார்ந்த தேர்தல் நடவடிக்கையாக இந்த நேர்காணல் பார்க்கப்படுகிறது. கூட்டணிக் கணக்கில் தேமுதிக எந்த தொகுதிகளில் போட்டியிடும் என்பது குறித்து அரசியல் வட்டாரங்களில் ஆர்வம் அதிகரித்துள்ள நிலையில், வேட்பாளர் தேர்வு பணிகள் தொடங்கியிருப்பது தேர்தல் களத்தை மேலும் சூடுபிடிக்கச் செய்துள்ளது.