புதுடெல்லி: ஈரான் – அமெரிக்க, இஸ்ரேல் கூட்டுப் படைகள் நடத்தும் போர் காரணமாக இந்தியாவுக்கு கச்சா எண்ணெய் கப்பல்கள் வருவதில் சிக்கல் ஏற்பட்டுள்ளது. இதனால் சமையல் காஸ் சிலிண்டர்கள் விநியோகத்திலும் பிரச்சினை நிலவுகிறது.
இந்நிலையில் வெளிமாநிலங்களில் இருந்து டெல்லிக்கு வந்து குடியேறியுள்ள பலருக்கு சிலிண்டர்கள் கிடைக்கவில்லை. அதிக விலை கொடுத்தும் வாங்க முடியாத நிலையில் பலர் சொந்த கிராமங்களுக்கு செல்கின்றனர். பழைய டெல்லி ரயில் நிலையத்தில் சான்ஜுக்டா என்ற பெண் தனது குடும்பத்தாருடன் டெல்லியை விட்டு தனது சொந்த கிராமத்துக்குச் செல்வதாகத் தெரிவித்தார்.
அவர் மேலும் கூறும்போது, “டெல்லியின் நங்லோய் பகுதியில் வசித்து வருகிறோம். தற்போது வேலையும் இல்லை. சமையல் காஸ் சிலிண்டரும் கிடைப்பதில்லை. கிடைத்தாலும் அதிக விலைக்கு விற்கப்படுகிறது. அதை வாங்க எங்களால் முடியவில்லை. நான் சமையல் வேலை செய்து வருகிறேன். எனது கணவரும் கூலி வேலைக்குச் செல்கிறார். எனக்கு தினந்தோறும் ரூ.200 மட்டுமே கிடைக்கிறது.
சமையல் காஸ் சிலிண்டர்(5 கிலோ) ரூ.600-க்கு விற்கின்றனர். அதை வாங்க முடியவில்லை. அதனால் தற்போது கிராமத்துக்குச் செல்கிறோம்.சமையல் காஸ் சிலிண்டர் கிடைக்காததால் டெல்லியில் திருமணங்கள் நடைபெறுவதும் குறைந்துள்ளது. இதனால் சமையல் வேலை கிடைப்பதில்லை. நான் வேலை பார்த்து வந்த கம்பெனியையும் மூடிவிட்டனர்.
எனவே, ஹரியானாவின் போரியா மாவட்டத்திலுள்ள எனது சொந்த கிராமத்துக்குச் செல்கிறேன். அங்கு எப்படியாவது சமாளித்துக் கொள்வேன்’’ என்றார். டெல்லி மட்டுமல்லாமல் நாட்டின் பல நகரங்களிலும் இதே நிலைதான் நிலவுகிறது என்று சுபாஷ் நகரைச் சேர்ந்த வினோத் குமார்(38) தெரிவித்தார். அவர் மேலும் கூறும்போது, “நான் கூலி வேலைக்குச் செல்கிறேன். தினந்தோறும் ரூ.400 கிடைக்கும்.
ஆனால் இப்போது வேலை கிடைப்பதில்லை. எனவே, பிஹாரில் உள்ள தர்பாங்காவுக்குச் செல்கிறேன். இந்தப் பிரச்சினைக்கு மத்திய அரசு தீர்வு காணவேண்டும். சமையல் காஸ் சிலிண்டர் தட்டுப்பாட்டை நீக்கவேண்டும். காஸ் சிலிண்டர் கிடைக்காததால் எனது மனைவி மண்ணெண்ணெய் அடுப்பில் சமைக்கிறார். இதனால் வீட்டில் புகை சூழ்ந்துகொள்கிகிறது. எனக்கு இருமல் பிரச்சினை ஏற்படுகிறது. வீட்டு உரிமையாளர் இதற்கு ஆட்சேபம் தெரிவிக்கிறார்’’ என்றார்.
More Stories
‘‘தொலைநோக்குப் பார்வையுடன் செயல்படும் கட்சி பாஜக’’ – அசாமில் பிரதமர் மோடி பேச்சு
2026 தமிழக சட்டமன்ற தேர்தல்: சென்னையில் இன்று பிரதமர் மோடி தலைமையில் மையக்குழு கூட்டம்!
மே.வங்க தேர்தலில் மம்தாவுக்கு இணையாக முக்கியத்துவம் பெறும் மருமகன் அபிஷேக்