– சேப்பாக்கத்தில் ஜிம்பாப்வேயுடன் இன்று மோதல்
Follow Us
சென்னை: ஐசிசி டி20 உலகக் கோப்பை கிரிக்கெட் தொடரின் சூப்பர் 8 சுற்றில் நடப்பு சாம்பியனான இந்திய அணி தனது 2-வது ஆட்டத்தில் ஜிம்பாப்வே அணியுடன் இன்று மோதுகிறது. இந்த ஆட்டம் இரவு 7 மணிக்கு சென்னை சேப்பாக்கம் எம்.ஏ.சிதம்பரம் மைதானத்தில் நடைபெறுகிறது.
சூர்யகுமார் யாதவ் தலைமையிலான இந்திய அணி சூப்பர் 8 சுற்றில் தனது முதல் ஆட்டத்தில் தென் ஆப்பிரிக்க அணியிடம் 76 ரன்கள் வித்தியாசத்தில் தோல்வி அடைந்தது. அந்த ஆட்டத்தில் 88 ரன்கள் இலக்கை துரத்திய இந்திய அணி 18.5 ஓவர்களில் 111 ரன்களுக்கு சுருண்டிருந்தது. இந்த தோல்வியால் இந்திய அணியின் நிகர ரன் ரேட் -3.800 ஆக உள்ளது.
இதனால் அரை இறுதிக்கு முன்னேறுவதற்கான வாய்ப்பை பெற வேண்டுமானால் இந்திய அணி இன்றைய ஆட்டம் உட்பட எஞ்சியுள்ள 2 ஆட்டங்களிலும் பெரிய அளவிலான வெற்றிகளை குவித்தாக வேண்டும் என்ற நெருக்கடியில் உள்ளது. டாப் ஆர்டரில் அபிஷேக் சர்மாவின் மோசமான பார்ம் அணியின் செயல் திறனை வெகுவாக பாதித்துள்ளது.
அவர், 4 ஆட்டங்களில் 3-ல் டக் அவுட் ஆகியிருந்தார். தென் ஆப்பிரிக்காவுக்கு எதிராக 15 ரன்கள் சேர்த்திருந்தார். நடப்பு தொடரில் அபிஷேக் சர்மாவுடன் சராசரி 3.75 ஆகவும், ஸ்டிரைக் ரேட் 75 ஆகவும் உள்ளது. மந்தமான ஆடுகளம், பவர்பிளேவில் சுழற்பந்து வீச்சாளர்கள் வேகத்தை குறைத்து வீசுவது உள்ளிட்டவை அபிஷேக் சர்மாவுக்கு கடும் சவால்களை அளித்து வருகின்றன.
லீக் சுற்றில் இஷான் கிஷன் அதிரடியாக விளையாடி ரன்கள் குவித்ததால் அபிஷேக் சர்மா விரைவிலேயே ஆட்டமிழந்த போதிலும் அது பெரிய அளவில் அணியின் செயல் திறன் தாக்கத்தை ஏற்படுத்தாமல் இருந்தது.
ஆனால் சூப்பர் 8 சுற்றில் தென் ஆப்பிரிக்காவுக்கு எதிரான ஆட்டத்தில் இஷான் கிஷன் முதல் ஓவரிலேயே ஆட்டமிழந்தது நெருக்கடியை உருவாக்கியது. 3-வது வீரராக களமிறங்கி வரும் திலக் வர்மாவிடம் இருந்தும் தொடர்ச்சியாக பெரிய அளவிலான மட்டை வீச்சு வெளிப்படவில்லை.
பந்துகளுக்கு நிகராக மட்டுமே ரன்கள் சேர்க்கும் அவர், சூழ்நிலைக்கு தகுந்தபடி தாக்குதல் ஆட்டம் மேற்கொள்ளாததும் பாதிப்பை ஏற்படுத்தி உள்ளது. நடப்பு தொடரில் அவரது ஸ்டிரைக் ரேட் 118 ஆக இருக்கிறது. இது நவீனகால டி20 கிரிக்கெட்டில் பவர்பிளேவில் மிக குறைந்த ஸ்டிரைக் ரேட்டாக பார்க்கப்படுகிறது.
மேலும் இவர்கள் 3 பேருமே இடதுகை பேட்ஸ்மேன்கள் என்பதால் எதிரணியினர் களவியூகங்களை எளிதாக அமைப்பதாகவும் கருத்து எழுந்துள்ளது. இதற்கு இன்றைய ஆட்டத்தில் இந்திய அணி தீர்வு காணக்கூடும். அநேகமாக அபிஷேக் சர்மா அல்லது திலக் வர்மா நீக்கப்பட வாய்ப்பு உள்ளது.
இவர்களுக்கு பதிலாக டாப் ஆர்டரில் சஞ்சு சாம்சன் களமிறங்கக்கூடும். இதற்கு தகுந்தவாறு கடந்த 2 நாட்களாக சஞ்சு சாம்சன் தீவிர பேட்டிங் பயிற்சியில் ஈடுபட்டுள்ளார். கேப்டன் சூர்யகுமார் யாதவ், ஆல்ரவுண்டர் ஹர்திக் பாண்டியா ஆகியோரும் கூடுதல் பொறுப்புடன் செயல்பட்டு ரன்களை குவிப்பதில் கவனம் செலுத்தக்கூடும்.
சூர்யகுமார் யாதவ் நடப்பு தொடரில் 180 ரன்கள் சேர்த்துள்ளார். அவரது ஸ்டிரைக் ரேட் 127 ஆக மட்டுமே இருக்கிறது. இதை, அவர் கவனத்தில் எடுத்துக்கொள்ளக்கூடும். டாப் 3 பேட்ஸ்மேன்கள் 3 பேரும் இடது கை வீரர்களாக இருப்பதால் இன்றைய ஆட்டத்தில் சூர்யகுமார் யாதவ் 3-வது வீரராக களமிறங்குவது குறித்தும் சிந்திக்கக்கூடும்.
பந்துவீச்சில் கடந்த ஆட்டத்தில் ஜஸ்பிரீத் பும்ரா, அர்ஷ்தீப் சிங் வேகக்கூட்டணி சிறப்பாக செயல்பட்டு இருந்தது. ஒரு கட்டத்தில் எதிரணியை 20 ரன்களுக்கு 3 விக்கெட்கள் என கட்டுப்படுத்திய இந்திய அணி அதன் பின்னர் கட்டுக்கோப்புடன் செயல்படத் தவறியது.
வருண் சக்ரவர்த்தி, ஹர்திக் பாண்டியா, ஷிவம் துபே, வாஷிங்டன் சுந்தர் ஆகியோர் அதிக ரன்களை வாரி வழங்கினர். அதிலும் வருண் சக்ரவர்த்தி 47 ரன்களையும், ஹர்திக் பாண்டியா 45 ரன்களையும் தாரை வார்த்து இருந்தனர். இதில் ஹர்திக் பாண்டியா, ஷிவம் துபே ஆகியோர் நோபால்களையும் வீசியிருந்தனர்.
இந்த நோபால்களும், ஹர்திக் பாண்டியா கடைசி ஓவரில் வாரி வழங்கிய 20 ரன்களும் பெரிய வித்தியாசத்தை ஏற்படுத்தியிருந்தன. இன்றைய ஆட்டத்தில் பந்துவீச்சில் மாற்றங்கள் இருக்க வாய்ப்பு உள்ளது. வாஷிங்டன் சுந்தருக்கு பதிலாக அக்சர் படேல் களமிறங்கக்கூடும்.
சிகந்தர் ராசா தலைமையிலான ஜிம்பாப்வே அணி லீக் சுற்றில் தோல்வியை சந்திக்காமல் சூப்பர் 8 சுற்றில் கால்பதித்து அனைவரையும் வியக்கவைத்திருந்தது. எனினும் அந்த அணி சூப்பர் 8 சுற்றின் முதல் ஆட்டத்தில் மேற்கு இந்தியத் தீவுகள் அணியிடம் 107 ரன்கள் வித்தியாசத்தில் தோல்வி அடைந்தது. இந்த தோல்வியால் ஜிம்பாப்வே அணியின் நிகர ரன் ரேட் -5.350 ஆக உள்ளது.
ஜிம்பாப்வே அணி அரை இறுதிக்கு முன்னேற வேண்டுமானால் இன்றைய ஆட்டம் உட்பட எஞ்சியுள்ள 2 ஆட்டங்களிலும் பெரிய அளவிலான ரன் ரேட் வித்தியாசத்துடன் வெற்றி பெற வேண்டும். மேலும் மற்ற ஆட்டங்களின் முடிவுக்காகவும் காத்திருக்க வேண்டும்.
ஜிம்பாப்வே அணியில் சுழற்பந்து வீச்சாளர்களாக கிரேம் கிரீமர், சிகந்தர் ராசா, ரியான் பரூல் ஆகியோர் உள்ளனர். எனினும் இந்த சுழற்பந்து வீச்சு கூட்டணி இந்திய அணியின் பேட்டிங் வரிசைக்கு சவால் கொடுக்கக்கூடிய அளவில் வலுவானதாக இல்லை என்றே கூறப்படுகிறது. அதேவேளையில் வேகப்பந்து வீச்சில் பிளெசிங் முசாராபானி, ரிச்சர்டு நரவா, பிராட் இவான்ஸ் ஆகியோர் அழுத்தம் கொடுக்கக்கூடும்.
திருந்துவாரா அபிஷேக் சர்மா?
நடப்பு உலகக் கோப்பை தொடரில் அபிஷேக் சர்மா 3 ஆட்டத்தில் ரன் ஏதும் எடுக்காமல் முதல் ஓவரிலேயே ஆட்டமிழந்தார். சூப்பர் 8 சுற்றில் அவர், 15 ரன்கள் சேர்த்த நிலையில் பவர்பிளேவிலேயே நடையை கட்டினார். எதிரணியினர் விரிக்கும் வலையில் அவர், சரியாக சிக்குகிறார்.
எந்த ஒரு கட்டத்திலும் அவர், தனது ஆட்ட பாணியை மாற்றிக் கொள்ள முயற்சிக்காதது பலவீனமாக மாறி உள்ளது. ஆனால் அபிஷேக் சர்மா போன்றே அதிரடி பாணியை கடைபிடிக்கக் கூடிய இங்கிலாந்து அணியின் கேப்டன் ஹாரி புரூக் நேற்று முன்தினம் சுழலுக்கு சாதகமான பல்லேகலே மைதானத்தில் பாகிஸ்தான் அணிக்கு எதிரான ஆட்டத்தில் அற்புதமாக விளையாடினார்.
சுழற்பந்து வீச்சில் ஹாரி புரூக் சிறப்பாக விளையாடக்கூடியவர் அல்ல. ஆனால் பாகிஸ்தானின் சுழற்பந்து வீச்சு படையை மிரளவைத்தார். தற்காப்பு ஆட்டத்துக்கும், ஆக்ரோஷ ஆட்டத்துக்கும் இடையில் தன்னை அற்புதமாக நிலை நிறுத்தினார்.
சுழற்பந்து வீச்சில் தற்காப்பு ஆட்டம் மேற்கொள்ள வேண்டிய இடத்தில் அதை செய்தார். ஆக்ரோஷம் காட்ட வேண்டிய இடத்தில் பந்துகளை வெளுத்து வாங்கி சதம் அடித்து அணியின் வெற்றிக்கு முக்கிய பங்களிப்பை வழங்கினார். இதில் இருந்து அபிஷேக் சர்மா பாடம் கற்றுக்கொள்ளக்கூடும்.
ஆடுகளம் எப்படி?
நடப்பு டி20 உலகக் கோப்பை தொடரில் சேப்பாக்கம் மைதானத்தில் நியூஸிலாந்து – ஆப்கானிஸ்தான் அணிகள் மோதிய லீக் ஆட்டத்துக்கு பயன்படுத்தப்பட்ட அதே ஆடுகளமே இன்று இந்தியா – ஜிம்பாப்வே அணிகள் மோதும் ஆட்டத்துக்கும் பயன்படுத்தப்பட உள்ளது.
நியூஸிலாந்து – ஆப்கானிஸ்தான் போட்டி காலை 11 மணிக்கு நடத்தப்பட்டிருந்தது. அந்த ஆட்டத்தில் 183 ரன்கள் இலக்கை விரட்டிய நியூஸிலாந்து 13 பந்துகளை மீதம் வைத்து 5 விக்கெட்கள் வித்தியாசத்தில் வெற்றி பெற்றிருந்தது. இந்த உலகக் கோப்பை தொடரில் சேப்பாக்கம் ஆடுகளம் மட்டுமே ரன்கள் குவிப்புக்கு பாதகம் இல்லாமல் இருந்து வருகிறது. இதை இந்திய வீரர்கள் பயன்படுத்திக் கொள்ளக்கூடும்
More Stories
சூப்பர் 8-ல் நியூஸி. உடன் இன்று மோதல்: வெற்றி நெருக்கடியுடன் களமிறங்குகிறது இலங்கை
T20 WC 2026: இந்தியாவுக்கு அரை இறுதி வாய்ப்பு கிடைக்குமா?
“தோனி, ரோஹித் சர்மா போல் சூர்யகுமார் பெரிய கேப்டன் அல்ல” – கைஃப் சூசகம்