நீலகிரியில் ரூ.2.59 கோடி பணம், தங்கம் பறிமுதல்.. சுற்றுலா செல்பவர்கள் கவனமுடன் செயல்பட எச்சரிக்கை!

தமிழகத்தில் சட்டமன்றத் தேர்தலை முன்னிட்டு தேர்தல் நடத்தை விதிகள் அமலுக்கு வந்துள்ள நிலையில், நீலகிரி மாவட்டத்தில் கண்காணிப்பு நடவடிக்கைகள் தீவிரமாக நடைபெற்று வருகின்றன. இந்த சூழலில், தேர்தல் பறக்கும் படையினர் மேற்கொண்ட சோதனைகளில் இதுவரை ரூ.2 கோடியே 59 லட்சம் மதிப்பிலான பணமும் நகைகளும் பறிமுதல் செய்யப்பட்டு உள்ளதாக நீலகிரி மாவட்ட தேர்தல் அதிகாரி லட்சுமி பவ்யா தண்ணீரு தெரிவித்து உள்ளார்.

தமிழகத்தில் சட்டமன்றத் தேர்தலை முன்னிட்டு தேர்தல் நடத்தை விதிகள் அமலுக்கு வந்துள்ள நிலையில், நீலகிரி மாவட்டத்தில் கண்காணிப்பு நடவடிக்கைகள் தீவிரமாக நடைபெற்று வருகின்றன.

இந்த சூழலில், தேர்தல் பறக்கும் படையினர் மேற்கொண்ட சோதனைகளில் இதுவரை ரூ.2 கோடியே 59 லட்சம் மதிப்பிலான பணமும் நகைகளும் பறிமுதல் செய்யப்பட்டு உள்ளதாக நீலகிரி மாவட்ட தேர்தல் அதிகாரி லட்சுமி பவ்யா தண்ணீரு தெரிவித்து உள்ளார்.

  

ஒரு வார காலத்தில்…

நீலகிரி மாவட்ட ஆட்சியர் அலுவலகத்தில் செய்தியாளர்களை சந்தித்த அவர், தேர்தல் தேதி அறிவிக்கப்பட்டதன் பின்னர் மாவட்டம் முழுவதும் வாகன சோதனைகள் அதிகரிக்கப்பட்டு உள்ளதாக கூறினார். குறிப்பாக மார்ச் 15 முதல் 22 வரை ஒரு வார காலத்தில் மட்டும் இந்த பறிமுதல் நடவடிக்கைகள் மேற்கொள்ளப்பட்டு உள்ளன.

மொத்தமாக பறிமுதல் செய்யப்பட்ட தொகையில் சுமார் ரூ.41 லட்சம் ரொக்கப் பணமும், மீதமுள்ள ரூ.2.18 கோடி மதிப்பிலான நகைகள் மற்றும் பிற விலை மதிப்புள்ள பொருட்களும் அடங்குவதாக அவர் விளக்கம் அளித்தார்.

தேர்தல் பணியில் பல்வேறு குழுக்கள்

நீலகிரி மாவட்டத்தில் உள்ள மூன்று சட்டமன்றத் தொகுதிகளிலும் தேர்தல் பணிகள் சீராக நடைபெற பல்வேறு குழுக்கள் செயல்பட்டு வருகின்றன. ஒன்பது பறக்கும் படைகள் அமைக்கப்பட்டு, அவற்றுடன் இணைந்து காவல்துறை, குழு பிரிவு அலுவலர்கள் மற்றும் வாக்குச்சாவடி நிலை அலுவலர்கள் பணியாற்றி வருகின்றனர்.

இவர்கள் அனைவருக்கும் ஆரம்ப கட்ட பயிற்சிகள் வழங்கப்பட்டு உள்ளதாகவும், தொடர்ந்து தலைமை அலுவலர்கள், வாக்குப்பதிவு அலுவலர்கள் உள்ளிட்டோருக்கு இந்த மாத இறுதிக்குள் விரிவான பயிற்சி அளிக்க திட்டமிடப்பட்டு உள்ளதாகவும் அவர் தெரிவித்தார்.

பறிமுதல் விடுவிப்பு குழு

பறிமுதல் செய்யப்பட்ட பணம் மற்றும் பொருட்களை மீண்டும் வழங்குவதற்கான நடைமுறைகளும் தெளிவாக உள்ளன. அதற்காக ‘பறிமுதல் விடுவிப்பு குழு’ அமைக்கப்பட்டு உள்ளதாகவும், உரிய ஆவணங்கள் சமர்ப்பிக்கப்பட்டால் 48 மணி நேரத்திற்குள் அவை திருப்பி வழங்கப்படும் என்றும் கூறினார். சில சந்தர்ப்பங்களில் பொதுமக்கள் அளித்த புகார்களின் அடிப்படையில் 24 மணி நேரத்திற்குள்ளேயே பொருட்கள் மீள வழங்கப்பட்டதாகவும் அவர் குறிப்பிட்டார்.

சுற்றுலாப் பயணிகளுக்கு அறிவுரை

மேலும், நீலகிரி மாவட்டம் சுற்றுலா முக்கியத்துவம் வாய்ந்த பகுதி என்பதால், சுற்றுலாப் பயணிகளுக்கு தேவையற்ற சிரமம் ஏற்படாத வகையில் அதிகாரிகளுக்கு தனிப்பட்ட அறிவுறுத்தல்கள் வழங்கப்பட்டுள்ளன. சோதனை மேற்கொள்ளும் போது அவர்கள் உண்மையான சுற்றுலாப் பயணிகளா என்பதை முதலில் உறுதி செய்ய வேண்டும் என்றும், தேவைக்கு அதிகமாக பணம் அல்லது நகைகள் வைத்திருந்தால் மட்டுமே பறிமுதல் செய்ய வேண்டும் என்றும் கூறப்பட்டு உள்ளது.

பீகார் தேர்தல் முடிவுகள்: வாக்குகள் களவாடப்பட்டுள்ளது- செல்வப்பெருந்தகை குற்றச்சாட்டு

பயணிகளுக்கு எச்சரிக்கை

தேர்தல் காலத்தில் சட்டவிரோத பணப் பரிவர்த்தனைகள் நடைபெறாமல் தடுக்க இந்த நடவடிக்கைகள் அவசியம் என அதிகாரிகள் வலியுறுத்தி உள்ளனர். பொதுமக்கள் தேவையான ஆவணங்களுடன் மட்டுமே பணம் மற்றும் மதிப்புள்ள பொருட்களை எடுத்துச் செல்ல வேண்டும் என்றும், இல்லையெனில் அவை பறிமுதல் செய்யப்படும் என்றும் எச்சரிக்கப்பட்டு உள்ளது. தேர்தல் சீர்மையான முறையில் நடைபெற இந்த கண்காணிப்பு நடவடிக்கைகள் தொடர்ந்து மேற்கொள்ளப்படும் எனவும் தெரிவிக்கப்பட்டு உள்ளது.