குடும்பமா சுற்றுலா போறீங்களா? முழு ரயில் பெட்டியையே முன்பதிவு செய்யலாம் – அது எப்படி?

நீங்கள் குடும்பமாகவோ அல்லது நண்பர்கள் நிறையப் பேர் சேர்ந்தோ சுற்றுலா அல்லது வெளியூர் செல்லத் திட்டமிட்டால் ஒரு முழு ரயில் பெட்டியையோ அல்லது ரயிலையோ வாடகைக்கு எடுக்கலாம்.

பயணிகளின் ரயில் பயணத்தை வசதியாக்குவதுடன், சிறப்பு நிகழ்வுகளுக்காகவும் தனித்துவமான சேவைகளை இந்திய ரயில்வே வழங்குகிறது. திருமணம், ஆன்மீக யாத்திரை அல்லது பெரிய குழுவாக சுற்றுலா போன்றவற்றைத் திட்டமிடும்போது, ரயில்வேயின் முழு கட்டண விகித (FTR) சேவையின் கீழ் ஒரு முழு ரயில் பெட்டியையோ அல்லது முழு ரயிலையோ கூட நீங்கள் முன்பதிவு செய்யலாம். இதற்காக IRCTC மற்றும் இந்திய ரயில்வே ஆன்லைன் மற்றும் ஆஃப்லைன் சேவைகளை வழங்குகின்றன. இதன் முக்கிய விதிகள், கட்டணங்கள் மற்றும் எளிமையான முன்பதிவு செயல்முறை குறித்து இங்கே பார்க்கலாம்.

முன்பதிவுக்கான முக்கிய விதிகள்!

இந்திய ரயில்வேயிடமிருந்து ஒரு முழு பெட்டியையோ அல்லது ரயிலையோ வாடகைக்கு எடுக்க முடியும் என்றாலும், இதற்கான விதிமுறைகள் மற்றும் நடைமுறைகள் சாதாரண பயணிகள் டிக்கெட் முன்பதிவைப் போல எளிமையாக இருக்காது. எனவே, முழு பெட்டி அல்லது முழு ரயிலை வாடகைக்கு எடுப்பதற்கு முன் பின்வரும் முக்கிய வழிகாட்டுதல்கள் மற்றும் விதிகளை நீங்கள் கவனத்தில் கொள்ள வேண்டும்.

பயணத் தேதிக்கு அதிகபட்சம் 6 மாதங்களுக்கு முன்பும், குறைந்தபட்சம் 30 நாட்களுக்கு முன்பும் நீங்கள் முன்பதிவு கோரிக்கையைச் சமர்ப்பிக்கலாம். வழக்கமான அட்டவணைப்படி இயங்கும் ரயிலில், தேவைக்கேற்ப 2 முதல் 10 பெட்டிகள் வரை (கிடைக்கும் பட்சத்தில்) முன்பதிவு செய்யலாம். ஒரு முழு ரயிலை முன்பதிவு செய்ய விரும்பினால், அதில் குறைந்தபட்சம் 18 பெட்டிகளும் அதிகபட்சம் 24 பெட்டிகளும் இருக்க வேண்டும். இதில் 2 SLR/ஜெனரேட்டர் பெட்டிகளும் அடங்கும்.

பயணத்தின்போது, பயணிகளை ஏற்றவோ அல்லது கூடுதல் பெட்டிகளை இணைக்கவோ நீங்கள் விரும்பும் எந்தவொரு நிலையத்திலும் ரயில் குறைந்தது 10 நிமிடங்கள் நின்று செல்ல வேண்டும். பாதுகாப்பு காரணங்களுக்காக, பயணம் தொடங்குவதற்கு சரியாக 48 மணி நேரத்திற்கு முன்பாக அனைத்து பயணிகளின் இறுதிப் பட்டியலையும் நீங்கள் ரயில்வேயிடம் சமர்ப்பிக்க வேண்டும். வழக்கமான ரயில் பெட்டிகளின் உட்புறத்தையோ அல்லது வெளிப்புறத்தையோ அலங்கரிக்க அனுமதி இல்லை. இருப்பினும், FTR சேவையின் கீழ் முழு ரயில் அல்லது பெட்டியை முன்பதிவு செய்யும்போது, நிர்ணயிக்கப்பட்ட விதிமுறைகளுக்கு உட்பட்டு தனியுரிமை மற்றும் சிறப்பு வசதிகளைப் பெற முடியும்.

டிக்கெட் செலவு விவரங்கள்!

முழு ரயில் அல்லது ஒரு பெட்டியை முன்பதிவு செய்வதற்கான கட்டணம், சாதாரண பயணச்சீட்டுகளின் கட்டணத்திலிருந்து சற்று மாறுபட்டது. இருக்கைக்கான கட்டணத்துடன், பாதுகாப்பு வைப்புத்தொகை (security deposit) மற்றும் சேவைக்கட்டணங்களையும் செலுத்த வேண்டும். இதில், பாதுகாப்பு வைப்புத்தொகை திரும்பப் பெறக்கூடியது. பயணம் முடிந்த 15 முதல் 20 நாட்களுக்குள் அந்தப் பணம் திருப்பி அளிக்கப்படும். ஒரு பெட்டிக்கு 7 நாள் பயணத்திற்கான கட்டணம் 50,000 ரூபாய் ஆகும். பயணம் 7 நாட்களுக்கு மேல் நீடித்தால் ஒரு நாளைக்குக் கூடுதலாக ரூ. 10,000 கட்டணம் வசூலிக்கப்படும்.

அதன்படி, 18 பெட்டிகளைக் கொண்ட முழு ரயிலுக்கும் நீங்கள் குறைந்தது ரூ. 9,00,000 செலுத்த வேண்டியிருக்கும். இருப்பினும், பயணம் வெற்றிகரமாக முடிந்த பிறகு பாதுகாப்பு வைப்புத்தொகை திருப்பி அளிக்கப்படும். முன்பதிவு செய்த பிறகு ரத்து செய்தால் மொத்தத் தொகையில் குறைந்தது 10 சதவீதம் பிடித்தம் செய்யப்படும் என்பதைக் கவனத்தில் கொள்ளவும்.

பயணக் கட்டணம்!

பாதுகாப்பு வைப்புத்தொகை தவிர, FTR முன்பதிவுக்கான கட்டணம் சாதாரண பயணச்சீட்டு முன்பதிவை விட 30 சதவீதம் முதல் 40 சதவீதம் வரை அதிகமாக இருக்கும். இருப்பினும், இறுதி கட்டணமானது பயணிக்கப்படும் மொத்த தூரம், பெட்டியின் வகை (Sleeper, 3AC, 2AC) மற்றும் ரயில்வே சேவைக் கட்டணம் ஆகியவற்றைப் பொறுத்து அமையும்.

முன்பதிவு செய்வதற்கான வழிமுறை!

உங்கள் வசதிக்கேற்ப, ரயில்வே நிர்வாகம் ஆன்லைன் மற்றும் ஆஃப்லைன் ஆகிய இரு வழிகளிலும் FTR முன்பதிவு வசதியை வழங்குகிறது. இதன் மூலம், உங்கள் வீட்டிலிருந்தபடியே முழு ரயில் அல்லது பெட்டியை முன்பதிவு செய்யலாம். ரயில் நிலையத்திற்குச் சென்றும் முன்பதிவு செய்யலாம்.

ஆன்லைனில் முன்பதிவு செய்வது எப்படி?

முதலில், IRCTCயின் அதிகாரப்பூர்வ FTR இணையதளத்திற்குச் (ftr.irctc.co.in) செல்ல வேண்டும்.

உங்கள் மின்னஞ்சல் முகவரி மற்றும் மொபைல் எண்ணைப் பயன்படுத்தி புதிய பயனர் கணக்கை உருவாக்க வேண்டும்.

இந்தக் கணக்கு உங்கள் வழக்கமான IRCTC ஐடியிலிருந்து வேறுபட்டது என்பதை நினைவில் கொள்ளவும்.

உள்நுழைந்த பிறகு, முகப்புப் பக்கத்தில் உள்ள ‘Coach Booking’ அல்லது ‘ Train Booking ‘ என்ற விருப்பத்தைத் தேர்ந்தெடுக்க வேண்டும்.

பயணத் தேதி, புறப்படும் மற்றும் சேரும் இடங்கள், பயணத்தின் நோக்கம் (திருமணம்/சுற்றுலா) மற்றும் பெட்டியின் வகை (Sleeper, AC போன்றவை) உள்ளிட்ட முழுமையான விவரங்களுடன் படிவத்தை நிரப்ப வேண்டும்.

படிவத்தைச் சமர்ப்பித்ததும் உங்களுக்கு ஒரு குறிப்பு எண் வழங்கப்படும். அதைத் தொடர்ந்து உடனடியாக, பாதுகாப்பு வைப்புத்தொகையை ஆன்லைனில் செலுத்த வேண்டும்.

அதன் பின்னர், ரயில்வே நிர்வாகம் பயணப் பாதை மற்றும் பெட்டி கிடைக்கும் தன்மை ஆகியவற்றைச் சரிபார்க்கும்.

அனைத்தும் சரியாக இருந்தால் உங்களுக்கு உறுதிப்படுத்தல் மற்றும் FTR எண் வழங்கப்படும்.

அதன் பிறகு, மீதமுள்ள கட்டணத்தைச் செலுத்த வேண்டியிருக்கும்.

ஆஃப்லைனில் முன்பதிவு செயல்முறை!

உங்கள் பயணம் தொடங்கும் முக்கிய ரயில் நிலையத்தில் உள்ள தலைமை முன்பதிவு மேற்பார்வையாளரிடம் (அல்லது நிலைய அதிகாரியிடம்) நீங்கள் எழுத்துப்பூர்வமான விண்ணப்பத்தைச் சமர்ப்பிக்க வேண்டும்.

அங்குள்ள அதிகாரி உங்கள் பயணப் பாதை மற்றும் பெட்டி தொடர்பான விவரங்களை பதிவு செய்வார்.

அதன் பின்னர் உங்களுக்கு ஒரு ரசீது வழங்கப்படும். இந்த ரசீதுடன் UTS கவுண்டருக்குச் சென்று, ரொக்கமாகவோ அல்லது டிஜிட்டல் முறையிலோ பாதுகாப்புத் தொகையைச் செலுத்தி உங்கள் FTR எண்ணைப் பெற்றுக்கொள்ளலாம்.