தொடர்ந்து மூன்றாவது நாளாக தங்கம் விலை சரிவு: இன்று பவுனுக்கு ரூ.1,200 குறைவு

சென்னை: தங்கம் விலை தொடர்ந்து மூன்றாவது நாளாக சரிந்துள்ளது. 22 காரட் ஆபரணத் தங்கத்தின் விலை சென்னையில் இன்று (மே 28) பவுனுக்கு ரூ.1,200 என குறைந்துள்ளது.

சர்வதேச பொருளாதார மற்றும் அரசியல் சூழல், மத்திய கிழக்கில் நிலவும் போர் பதற்றம், கச்சா எண்ணெய் விலை, அமெரிக்க டாலருக்கு நிகரான இந்திய ரூபாயின் மதிப்பு, தங்கத்தின் மீதான முதலீடு, உலக பங்குச் சந்தை செயல்பாடு உள்ளிட்டவற்றின் அடிப்படை​யில் தங்கத்தின் விலை நிர்ணயிக்கப்படுகிறது. உலக அளவில் தங்கத்தை இறக்குமதி செய்யும் நாடுகளில் இந்தியா முன்னணியில் உள்ளது.

கடந்த 13-ம் தேதி தங்கத்தின் மீதான சுங்க வரியை 6 சதவீதத்தில் இருந்து 15 சதவீதமாக மத்திய அரசு உயர்த்தியது. அதையடுத்து தங்கம் விலையில் தொடர்ந்து மாற்றம் ஏற்பட்டு வருவது குறிப்பிடத்தக்கது.

இந்நிலையில், தங்கம் விழா கடந்த 26-ம் தேதி முதல் தொடர்ந்து சரிந்து வருகிறது. இன்று காலை வர்த்தகம் தொடங்கியதும் சென்னையில் 22 காரட் ஆபரணத் தங்கத்தின் விலை கிராமுக்கு ரூ.150 குறைந்து, ஒரு கிராம் ரூ.14,500-க்கும், பவுனுக்கு ரூ.1,200 குறைந்து, ஒரு பவுன் ரூ.1,16,000-க்கும் விற்பனையாகிறது. அந்த வகையில் மே 26, 27, 28 ஆகிய தேதிகளில் மட்டும் தங்கம் விலை கிராமுக்கு ரூ.280 மற்றும் பவுனுக்கு ரூ.2,240 என குறைந்துள்ளது.

24 காரட் தங்கம் பவுனுக்கு ரூ.1,312 என விலை குறைந்து, ஒரு பவுன் ரூ.1,26,544-க்கும், 18 காரட் தங்கம் பவுனுக்கு ரூ.1,040 என விலை குறைந்து, ஒரு பவுன் ரூ.97,280-க்கும் விற்பனையாகிறது.

வெள்ளி விலையை பொறுத்தவரையில் இன்று கிராமுக்கு ரூ.5 குறைந்து, ஒரு கிராம் ரூ.285-க்கும், கட்டி வெள்ளி கிலோவுக்கு ரூ.5,000 குறைந்து, ஒரு கிலோ ரூ.2,85,000-க்கும் விற்பனையாகிறது.