சிலிண்டர் விலை உயர்வு – பொதுமக்களுக்கு முதல் நாளே வந்த அதிர்ச்சி

ஜூன் மாதம் முதல் தேதியான இன்று இந்தியாவில் சிலிண்டர் விலை உயர்ந்துள்ளது. இதனால் நுகர்வொருக்கு இனி அதிகம் செலவாகும்.

இன்று, ஜூன் 1 ஆம் தேதி நாட்டு மக்களுக்கு அதிர்ச்சி தரும் வகையில் காலையிலேயே ஒரு முக்கியமான அறிவிப்பு வெளியாகியுள்ளது. சிலிண்டர் விலை உயர்த்தப்பட்டுள்ளது. நாடு முழுவதும் வர்த்தக எல்பிஜி சிலிண்டர் விலைகள் உயர்த்தப்பட்டுள்ளன. இந்த விலை உயர்வு தங்களின் அன்றாட செயல்பாடுகளுக்கு சமையல் எரிவாயுவை மட்டுமே நம்பியிருக்கும் உணவகங்கள், ஹோட்டல்கள், கேட்டரிங் நிறுவனங்கள் மற்றும் ஆயிரக்கணக்கான சிறு வணிக உரிமையாளர்கள் மீதான அழுத்தத்தை அதிகரித்துள்ளது.

இந்த விலையேற்றத்துக்குப் பிறகு டெல்லியில், 19 கிலோ எடை கொண்ட வர்த்தக எல்பிஜி சிலிண்டரின் விலை 42 ரூபாய் உயர்த்தப்பட்டு அதன் சில்லறை விலை ரூ. 3,113.50 ஆக உள்ளது. அதேபோல, கொல்கத்தாவில் இந்த விலை உயர்வு இன்னும் அதிகமாக இருக்கிறது. அங்கு ஒரு சிலிண்டரின் விலை 53.50 ரூபாய் அதிகரித்து ரூ. 3,255.50 ஆக உயர்ந்துள்ளது. இருப்பினும், வீட்டு உபயோக எல்பிஜி சிலிண்டர் விலைகள் மாற்றமின்றி இருப்பதால் இது குடும்பங்களின் பட்ஜெட்டுக்கு ஓரளவு நிவாரணம் அளித்துள்ளது.

  

தொடர்ச்சியான விலையேற்றம்

இந்த ஆண்டின் தொடக்கத்தில் இருந்தே வர்த்தக எல்பிஜி சிலிண்டர் விலைகள் விண்ணை முட்டும் அளவுக்கு உயர்ந்து வருவதால், இந்த சமீபத்திய விலை உயர்வு வழக்கமான ஒன்றாக மாறிவிட்டது. கடந்த ஜனவரி மாதம் டெல்லியில் ஒரு 19 கிலோ வர்த்தக சிலிண்டரின் விலை வெறும் ரூ. 1,691.50 ஆக இருந்தது. அதைத் தொடர்ந்த மாதங்களில் செய்யப்பட்ட மாற்றங்களால், அதன் விலை ரூ. 3,113.50 ஆக உயர்ந்துள்ளது. பிப்ரவரி மாதம் சிலிண்டர் விலை 49 ரூபாய் அதிகரித்தது. அதைத் தொடர்ந்து மார்ச் மாதத்தில் மேலும் 115 ரூபாய் உயர்த்தப்பட்டது. ஏப்ரல் மாதத்தில், ஒரே அடியாக விலை 993 உயர்ந்தது.

மே மாதத்திலும் விலை அதிகமாகவே இருந்தது. இப்போது ஜூன் மாதத்திலும் மற்றொரு விலை உயர்வு ஏற்பட்டுள்ளது. இதன் விளைவாக, வர்த்தக எல்பிஜி சிலிண்டரின் விலை வெறும் ஐந்து மாதங்களில் கிட்டத்தட்ட இருமடங்காக உயர்ந்துள்ளது. நாடு முழுவதும் உள்ள முக்கிய நகரங்களில் சிலிண்டர் விலை கணிசமாக உயர்ந்துள்ளது. மும்பையில் 19 கிலோ சிலிண்டரின் விலை இப்போது 3,024.50 ரூபாயாக உள்ளது. அதேபோல, சென்னையில் சிலிண்டர் விலை 3,232 ரூபாயாக உயர்ந்துள்ளது.

சிஎன்ஜி மற்றும் பெட்ரோல் – டீசல் விலை

டெல்லி மற்றும் அதைச் சுற்றியுள்ள நகரங்களில் சிஎன்ஜி விலை கிலோவுக்கு ரூ. 2 உயர்த்தப்பட்டு புதிய விலை கிலோவுக்கு ரூ. 83.09 ஆக உள்ளது. இரண்டு வாரங்களுக்கும் குறைவான காலத்தில் இது நான்காவது விலை உயர்வாகும். மேலும், மே 15ஆம் தேதி முதல் சிஎன்ஜி விலை கிலோவுக்கு மொத்தம் ரூ. 6 அதிகரித்துள்ளது. அதுமட்டுமில்லாமல், சர்வதேச கச்சா எண்ணெய் விலை உயர்வால் எண்ணெய் நிறுவனங்கள் பெட்ரோல் மற்றும் டீசல் விலைகளையும் உயர்த்தியுள்ளன. சமீபத்திய வாரங்களில், பெட்ரோல் விலை லிட்டருக்கு 7.35 ரூபாயும், டீசல் விலை லிட்டருக்கு 7.53 ரூபாயும் உயர்ந்துள்ளது. போக்குவரத்து மற்றும் சமையல் எரிவாயு இரண்டையும் சார்ந்துள்ள வணிகங்களுக்கு இது ஒரு பெரும் அடியாக அமைந்துள்ளது.

சர்வதேச நெருக்கடியால் விலை உயர்வு

வணிக எல்பிஜி சிலிண்டர் விலையில் ஏற்பட்டுள்ள இந்தத் திடீர் உயர்வுக்கு, உலகளாவிய எரிசக்தி விநியோகச் சங்கிலியில் ஏற்பட்டுள்ள இடையூறுகளே காரணம் ஆகும். மத்திய கிழக்கில் நிலவும் பதற்றங்கள், குறிப்பாக ஈரான் நெருக்கடி மற்றும் வளைகுடாப் பிராந்தியத்தில் அதிகரித்து வரும் பிரச்சினைகள் ஆகியவை எரிசக்தி விநியோகத்தை கடுமையாகப் பாதித்துள்ளன. இது உலகளவில் எல்பிஜி விலை உயர்வுக்கு வழிவகுத்ததுடன், புதிய சரக்குகளைப் பெறுவதையும் கடினமாக்கியுள்ளது.