பிக்பாஸ் ஜூலியின் மெரினா சம்பவம்- தவெக-விற்கு எதிராகப் பதாகை ஏந்தியதால் போலீஸ் விசாரணை!

மெரினாவில் தவெக-விற்கு எதிராக அனுமதி இன்றிப் பிரச்சாரம் செய்த ஜூலியைப் பிடித்து, போலீசார் எச்சரித்து அனுப்பினர்.

சென்னை மெரினா கடற்கரையில் தமிழக வெற்றிக் கழகத்திற்கு (தவெக) எதிராகப் பதாகைகளை ஏந்திப் பிரச்சாரத்தில் ஈடுபட்ட பிக் பாஸ் புகழ் ஜூலையைப் பிடித்துப் போலீசார் விசாரணை நடத்திய சம்பவம் பெரும் பரபரப்பை ஏற்படுத்தியுள்ளது.

திமுக ஆதரவு – தவெக எதிர்ப்பு பரப்புரை

சென்னை மெரினா கடற்கரைக்கு இன்று வருகை தந்த ஜூலி, அங்குள்ள பொதுமக்களிடையே திடீர் பரப்புரையில் ஈடுபட்டார். அப்போது அவர் கையில் வைத்திருந்த பதாகைகளில், ஆளும் திமுக அரசுக்கு ஆதரவாகவும், நடிகர் விஜய்யின் தமிழக வெற்றிக் கழகத்திற்கு எதிராகவும் வாசகங்கள் இடம் பெற்றிருந்தன. பெண்களுக்கு இவர்களால் பாதுகாப்பு இல்லை என்பது போன்ற வாசகங்களை ஏந்தி அவர் வாக்குச் சேகரிப்பில் ஈடுபட்டார்.

போலீசார் அதிரடி விசாரணை

தற்போது தேர்தல் நடத்தை விதிகள் அமலில் உள்ள நிலையில், மெரினா போன்ற பொது இடங்களில் பரப்புரை செய்யத் தேர்தல் ஆணையத்திடம் உரிய அனுமதி பெற வேண்டும். ஆனால், எந்தவித முன் அனுமதியும் இன்றி ஜூலி இந்தப் பரப்புரையில் ஈடுபட்டதாகக் கூறப்படுகிறது. இதனைத் தொடர்ந்து, அங்குப் பாதுகாப்புப் பணியில் இருந்த போலீசார் ஜூலியைத் தடுத்து நிறுத்தி விசாரணை நடத்தினர்.

எச்சரித்து விடுவிப்பு

விசாரணையின் போது, உரிய அனுமதி இன்றி இது போன்ற அரசியல் பரப்புரைகளில் ஈடுபடுவது தேர்தல் விதிமீறல் என்று போலீசார் அவருக்கு விளக்கினர். பின்னர், இனிமேல் முறையான அனுமதி இன்றி இதுபோன்ற செயல்களில் ஈடுபடக்கூடாது என எச்சரித்த போலீசார், அவரிடமிருந்து எழுத்துப்பூர்வமான விளக்கத்தைப் (எழுதி வாங்கிய பின்) பெற்றுக்கொண்டு அவரை விடுவித்தனர்.

அரசியல் களத்தில் ஜூலி

ஜல்லிக்கட்டு போராட்டத்தின் மூலம் புகழ்பெற்ற ஜூலி, கடந்த சில வாரங்களாகவே திமுக மேடைகளில் தவெக-விற்கு எதிராகத் தீவிரமாகப் பேசி வருகிறார். குறிப்பாக, விஜய்யின் அரசியல் வருகை குறித்து அவர் முன்வைத்த விமர்சனங்கள் சமூக வலைதளங்களில் விவாதங்களை ஏற்படுத்தியுள்ளன. இந்த நிலையில், மெரினாவில் அவர் நடத்திய இந்தப் பிரச்சார முயற்சி தவெக மற்றும் திமுக ஆதரவாளர்களிடையே சமூக வலைதளங்களில் மோதலை உருவாக்கியுள்ளது

  

அவதூறு வீடியோக்கள்:

ஜூலியின் விமர்சனங்களுக்குப் பதிலடி கொடுக்கும் வகையில், தவெக ஆதரவாளர்கள் ஜூலிக்கு எதிராக அவதூறு வீடியோக்களைப் பரப்புவதாக அவர் குற்றம் சாட்டியுள்ளார். குறிப்பாக, ஜூலையை ஒரு மோசடி கும்பலுடன் (Kidney Scam) இணைத்து பரப்பப்பட்ட வீடியோக்கள் பெரும் சர்ச்சையை ஏற்படுத்தின.

காவல்துறையில் புகார்

தவெக நிர்வாகிகள் சிலர் தனது நற்பெயருக்குக் களங்கம் விளைவிப்பதாகக் கூறி, ஜூலி சென்னை கமிஷனர் அலுவலகத்தில் புகார் அளித்துள்ளார். பெண்களுக்கு எதிரான இணைய வழித் தாக்குதல்களைத் தடுக்க நடவடிக்கை எடுக்குமாறு அவர் வலியுறுத்தியுள்ளார்.

விஜய் ரசிகர்கள் & தவெக ஆதரவாளர்கள்

“விஜய் சொல்லும் ஆழமான கருத்துக்களைப் புரிந்து கொள்ளாமல், விளம்பரத்திற்காக ஜூலி அவரைத் தொடர்ந்து விமர்சித்து வருகிறார். இது திமுக-வின் தூண்டுதலால் நடக்கும் அரசியல் நாடகம்” என்று விமர்சித்து வருகின்றனர். மேலும், #JulieKidneyScam போன்ற ஹேஷ்டேக்குகளும் ஒரு தரப்பால் பகிரப்படுகின்றன. நடிகை ஜூலிக்கும் தமிழக வெற்றிக் கழகத்தினருக்கும் இடையேயான விவகாரம் கடந்த சில வாரங்களாகவே இணையத்தில் பேசுபொருளாக உள்ளது.