தவெக தலைமையில் புதிய கூட்டணி? நாளை ஆதரவு கட்சிகளை சந்திக்கும் விஜய்!

முதல்வர் விஜய், தோழமைக் கட்சிகளுடன் கலந்துரையாட திட்டமிட்டுள்ளார். நாளை நடைபெறவுள்ள அந்த கூட்டத்திற்கு விசிக, மதிமுக மற்றும் ஐயுஎம்எல் கட்சிகளுக்கு தவெக அழைப்பு விடுத்துள்ளது. என்ன விவரம் என பார்க்கலாம்.

தமிழ்நாடு சட்டப்பேரவைத் தேர்தலில் திமுக, அதிமுக இரு பிரதான திராவிட கட்சிகளையும் பின்னுக்குத் தள்ளி விஜய் தலைமையிலான தமிழக வெற்றிக் கழகம் 108 இடங்களில் வெற்றி பெற்றது. ஆட்சியமைக்க அழைக்கக் கோரி ஆளுநரிடம் தவெக தலைவர் விஜய் கோரிக்கை வைத்த நிலையில், பெரும்பான்மைக்கான பட்டியலை அளிக்குமாறு அவர் கேட்டிருந்தார். இந்த நிலையில் விசிக, சிபிஐ மற்றும் சிபிஎம், ஐயுஎம்எல் கட்சிகளிடம் தவெக ஆதரவு கேட்டிருந்தது. 5 உறுப்பினர்களை கொண்ட காங்கிரஸ், முதல் கட்சியாக ஆதரவளித்த நிலையில், கம்யூனிஸ்ட்கள், விசிக, ஐயுஎம்எல் ஆகிய கட்சிகளும் அதைத்தொடர்ந்து ஆதரவு அளித்தன. காங்கிரஸ், கம்யூனிஸ்ட்கள், விசிக, ஐயுஎம்எல் ஆகியவை அமைச்சரவையிலும் இடம்பெற்றுள்ளன.

திமுக கூட்டணியில் இருந்து தேர்தலை சந்தித்த கட்சிகள் தேர்தல் முடிவிற்கு பிறகு தவெகவிற்கு ஆதரவு அளித்த காரணத்தால் திமுகவால் கடும் விமர்சனத்திற்கு உள்ளாகின. மறுபுறம் இந்த ஆட்சி நீடிக்காது என திமுக தலைவர் ஸ்டாலினும் தொடர்ந்து கூறிவருகிறார். அதே போல இந்தியா கூட்டணி கூட்டத்திலும் திமுக பங்கேற்கவில்லை. திமுக கூட்டணியில் இருந்த கூட்டணி கட்சிகள் தவெகவிற்கு ஆதரவு அளித்ததால் புதிய கூட்டணி உருவாகிறதா என்ற கேள்வியும் எழுந்து இருக்கிறது.