வரலாறு படைத்த தமிழகம்: 2026 சட்டமன்றத் தேர்தலில் 85.15% வாக்குகள் பதிவு எனத் தேர்தல் ஆணையம் அறிவிப்பு!

தமிழகத்தின் 234 தொகுதிகளிலும் 85.15% வாக்குகள் பதிவாகிப் புதிய வரலாறு படைக்கப்பட்டுள்ளது. இந்த அசுரவேக வாக்குப்பதிவு மே 4-ல் மிகப்பெரிய அரசியல் மாற்றத்தை ஏற்படுத்தும் என அரசியல் விமர்சகர்கள் தங்களது கருத்துக்களை தெரிவித்து வருகின்றனர்.

தமிழகச் சட்டமன்றத் தேர்தல் 2026, தமிழக அரசியல் வரலாற்றில் ஒரு முக்கியத் திருப்புமுனையாகவும், ஜனநாயகத்தின் மாபெரும் திருவிழாவாகவும் பார்க்கப்படுகிறது. மாநிலத்தின் 234 தொகுதிகளிலும் ஒரே கட்டமாக நடைபெற்ற இந்த வாக்குப்பதிவில், இதுவரை இல்லாத அளவாக 85.15% வாக்குகள் பதிவாகிப் புதிய வரலாறு படைக்கப்பட்டுள்ளது. பாரம்பரியக் கட்சிகளான திமுக மற்றும் அதிமுக கூட்டணிகளுக்கு இடையே நிலவும் கடும் போட்டிக்கு மத்தியில், புதிய சக்தியாக உருவெடுத்துள்ள தமிழக வெற்றி கழகம் (TVK) மற்றும் நாம் தமிழர் கட்சியின் தனித்துப் போட்டி ஆகியவை இந்தத் தேர்தலை நான்கு முனைப் போட்டியாக மாற்றியுள்ளன.

இளைஞர்கள் மற்றும் முதல்முறை வாக்காளர்களின் எழுச்சி, மாநில உரிமைகள், சமூகநீதி மற்றும் மாற்றத்திற்கான முழக்கம் எனப் பல காரணிகள் மக்களின் வாக்குப்பதிவு ஆர்வத்தை உச்சத்திற்குத் தள்ளியுள்ளன. அமைதியான முறையில் நடந்து முடிந்த இந்தத் தேர்தல், தமிழகத்தின் அடுத்த ஐந்தாண்டு காலத் தலைவிதியைத் தீர்மானிக்கப்போவது மட்டுமின்றி, ஒரு புதிய அரசியல் திசையை நோக்கி மாநிலத்தை அழைத்துச் செல்லும் என எதிர்பார்க்கப்படுகிறது

அசுர வேக வாக்குப்பதிவு

தமிழகம் முழுவதும் நேற்று நடைபெற்ற தேர்தலில் வாக்காளர்கள் காட்டிய அதீத ஆர்வத்தால், மாநிலத்தின் ஒட்டுமொத்த வாக்குப்பதிவு 85.15%-ஆக உயர்ந்துள்ளது. இது கடந்த 2021 தேர்தலை விடச் சுமார் 12 சதவீதம் அதிகமாகும்.

முதலிடத்தில் கரூர் மற்றும் வீரபாண்டி

மாநிலத்திலேயே மிக அதிகபட்சமாக கரூர் மற்றும் வீரபாண்டி தொகுதிகள் தலா 93.40% வாக்குகளைப் பதிவு செய்து முதலிடத்தைப் பகிர்ந்து கொண்டுள்ளன

டாப் 10 தொகுதிகளின் சாதனை

டாப் 10 பட்டியலில் இடம்பெற்றுள்ள அனைத்து தொகுதிகளுமே 90 சதவீதத்திற்கும் அதிகமான வாக்குகளைப் பதிவு செய்து அசத்தியுள்ளன. இதில் குளித்தலை, குமாரபாளையம் போன்ற தொகுதிகள் முக்கிய இடம்பிடித்துள்ளன.

1. கரூர் 93.40 %
2. வீரபாண்டி 93.40 %
3. குளித்தலை 92.79 %
4. குமாரபாளையம் 92.65 %
5. பாலக்கோடு 92.57 %
6. சங்ககிரி 92.53 %
7. பெருந்துறை 92.47 %
8. கிருஷ்ணராயபுரம் 92.45 %
9. மதுராந்தகம் 92.28 %
10. திருப்பூர் தெற்கு 90.71 %

தேர்தல் ஆணையம் பாராட்டு

அமைதியான முறையில் இவ்வளவு பெரிய வாக்குப்பதிவைச் சாத்தியமாக்கிய வாக்காளர்களுக்கும், பாதுகாப்புப் பணியில் ஈடுபட்டவர்களுக்கும் தேர்தல் ஆணையம் தனது நன்றியைத் தெரிவித்துள்ளது.